"El verdadero Zuloaga" liburua otsailaren 24an aurkeztuko da Eibarren, Ignacio Zuloaga Institutuan

Aurkezpena margolariaren izena daraman Eibarko Institutuan egingo da, otsailaren 24an, goizeko 11:30ean,  bertako Batxiler Artistikoko ikasleak aurrean daudela. Ekitaldian izango dira Rosa Jaussi ikastetxeko zuzendaria; Foru Aldundiko Harkaitz Millán Kultura diputatua, Alberto Albistegui alkateordea, eta Ignacio Suárez-Zuloaga, Margarita Ruyra eta Ismael Manterola adituak. Hiru adituek ikasleen galderei erantzungo diete, Ego Ibarra batzordeak Eibarko herriaren sorreraren 675. urteurreneko jardueren barruan antolatutako ekitaldian, pintorearen 150. urteurreneko jarduerei amaiera emango diena eta hedabideentzat zabalik egongo dena.

Juan Pablo Fusi, Javier Barón, Jabier Portús, Eliseo Trenç, Suzanne L. Stratton-Pruit, Sara Hidalgo, María Encina Cortizo, Pavel Stepanek, Eugenia Querci, Javier Novo, Margarita Ruyra, Juan José Junquera, Abraham Rubio, Yuri Saveliev, Ismael Manterola, Ramón Sobrino, Rodrigo Gutiérrez-Viñuales, José Romero Portillo, Mikel Lertxundi eta Helena Pereña adituek jorratu dute Zuloagaren lana El verdadero Zuloaga obra mardulean, Ignacio Suárez-Zuloagak editatutakoa.

Lana lau zatitan dago banatuta; hasteko Zuloaga hainbat testuingurutan jorratzen da. Hasierako bi testuek euskal giroa eta Zuloagatarren sagaren balioak aztertzen dituzte, eta amaieran haren nortasunaren deskribapen bat egiten da. Hirugarren idatzia Santiago Etxeari eskainia da, non artistak etxea eta tailerretako bat izan zuen, bere bizitzaren azken hogeita hamar urteetan; etxe hori, gainera, haren sorkari nagusienetako bat izan zen. Gero gai korapilotsuagoak jorratzen ditu: pintorearen jokaera Gerra Zibilean eta amaierarik ez duen polemika: ‘Zuloaga auzia’.

Bigarren atalak  pintura-estiloa eta jaso zituen influentziak ditu ardatz. Gaztetako bilaketatik hasi, hainbat estilotatik pasatu eta estilo propio bat garatzeraino egindako bidea, besteengandik oso bereizia. Eta jarraian aztertzen da pintore frantziar batzuek  gaztetako esperimentuetan zer eragin izan zuten. Hurrengo testuak Zuloagak gehien miretsi eta bildu zituen maisuei dedikatutakoak dira: Greko, Goya eta Zurbaran.

Hirugarren bloke batean haren pinturetan azaltzen diren gai batzuk lantzen dira. Lehen gaia marjinatuak dira; eibartarrak hasiera-hasieratik lehentasunezko leku bat eman zien eta. Bloke horretako bigarren testua artistaren obran 'euskal gaiek' duten lekuari buruzkoa da.  Jarraian ‘Andaluziako gaiek' duten tokia aztertzen da. Lurraldeei buruzko ibilbideari amaiera emateko, Gaztelako gaien eragina miatzen da, izan ere, bere osaba zeramista  Daniel Zuloagaren eskutik ezagutu zuen lurralde hura.  Azkenik, pintoreak arte eszeniko eta musikalekiko zuen interesa dugu aztergai.

Amaierako testu sortak artistaren proiekzio internazionala jorratzen du eta artistaren obrak Iberoamerikan, Errusian, Alemanian, Austrian, Italian, Txekian eta AEBn, hurrenez hurren, izan zuen eragina eta izan zituen gorabeherak islatzen ditu.

Oraingoan, Batxiler Artistikoko Eibarko Institutuko ikasleen begiradapean jarri dugu adituetan adituenek egindako liburua.